चाफा बोलेना

गीत : कवी ‘बी’
संगीत : वसंत प्रभु
स्वर : लता मंगेशकर

चाफा बोलेना, चाफा चालेना
चाफा खंत करी, काही केल्या फुलेना

गेले आंब्याच्या बनी, म्हटली मैनासवे गाणी
आम्ही गळयांत गळे मिळवूनी रे

गेले केतकीच्या बनी, गंध दरवळला वनी
नागासवे गळाले देहभान रे

चल ये रे, ये रे गडया, नाचू उडू घालू फुगडया
खेळू झिम्मा झिम पोरी झिम पोरी झिम

हे विश्वाचे आंगण, आम्हा दिले आहे आंदण
उणे करु आपण दोघे जण
जन विषयाचे किडे, ह्यांची धाव बाह्याकडे
आपण करु शुद्ध रसपान रे

चाफा फुले आला फुलून
तेजी दिशा गेल्या आटून
कोण मी चाफा, कोठे दोघे जण रे